Bihar leh TN-ah NDA party-te LS seat insem dan turah inrem

20th March, 2024

Bharatiya Janata Party (BJP) chuan Lok Sabha inthlanpui lo awm tur atana National Democratic Alliance (NDA)-a an thawhpui, Bihar-a Janata Dal (U), Lok Janshakti Party (Ram Vilas), Hindustan Awam Morcha (HAM) leh Rashtriya Lok Morcha (RLM) te nen seat chuh tur insem dan turah inremna an neih thu an puang. Bihar bakah hian, BJP hian Tamil Nadu-a an thawhpui; Pattali Makkal Katchi (PMK) nena seat insem tura inremna an neih thu hi an puang bawk.

Bihar-ah hian Lok Sabha seat 40 a awm a, seat 40 aṭang hian BJP chuan seat chang hnem berin, seat 17 an chuh dawn a ni. Janata Dal (U) chuan seat 16 an chuh anga, Chirag Paswan-a kaihhruai, Lok Janshakti Party (Ram Vilas) chuan seat panga an chuh ang. Hindustan Awam Morcha (HAM) leh Rashtriya Lok Morcha (RLM) te chuan Lok Sabha seat pakhat ve ve an chuh dawn bawk a ni.

BJP hian Tamil Nadu-a an thawhpui, Dr. S Ramadoss kaihhruai, Pattali Makkal Katchi (PMK) party nen Lok Sabha inthlan atana seat insem dan turah inremna an neih tawh thu an tarlang bawk. Inremna hi Tamil Nadu state BJP president, K Annamalai leh PMK dintu, Ramadoss te chuan an ziak a ni. Inremnaa an tarlan angin, PMK hian Tamil Nadu aṭang hian Lok Sabha seat 10 an chuh ang.

Union Minister Pashupati Kumar Paras a bang

Bihar-a NDA-in Lok Sabha seat chuh tur insem dan tura inremna an siamte puanzar a nih hnuah, Rashtriya Lok Janshakti Party (RLJP) hotu leh central-a Food Processing Industries Minister minister ni lai, Pashupati Kumar Paras chuan banna a theh lut. Seat insem turah hian Paras-a kaihhruai LJP hi seat pek an ni ve lo.

Paras hian a party chu NDA-in Lok Sabha seat chuh tura inbiakna an neihah an telh ve lo nia sawiin, NDA aṭang chuan seat chuh tur pawh pek an ni lo a, hei hi an party laka rorelna dik lo tak a nih thu a sawi. Paras hi Bihar-a Hajipur constituency aṭanga thlan tlin a ni a, hetih lai hian a unaupa fapa, Chirag Paswan chu NDA seat insemna aṭangin Hajipur constituency-ah hian a ding dawn a ni. NDA seat insemah hian Paras-a kaihhruai, RLJP hi seat pek an ni lo a, a unaupa fapa, Chirag Paswan kaihhruai LJP (Ram Vilas) erawh chuan Bihar aṭang hian seat panga an chuh dawn thung a ni.