Lok Sabha inthlan tur avangin UPSC leh CA exam hun sawn

Election Commission of India (ECI)-in 2024 Lok Sabha inthlan neih hun tur a puan hnuah, Union Public Service Commission (UPSC)-in civil service exam a buatsaih tur leh, Institute of Chartered Accountants of India (ICAI)-in Chartered Accountants (CA) exam a buatsaih turte chu a hun sawn a nih thu an puang.

UPSC hian civil service examination hi kum tin a buatsaih ṭhin a, kuminah hian May 26-a exam turin ruahmanna siam ni mah se, ECI-in Lok Sabha inthlan hun tur a puan hun chhunga a awm avangin, UPSC hian civil service exam hun hi June 16-a sawn a nih thu a puang a ni. UPSC bakah hian ICAI chuan CA exam hun tura ruahmanna an lo siam tawh chu Lok Sabha inthlan lai a nih dawn avangin sawn a nih thu an puang ve bawk.

Ruahmanna hmasaah chuan CA exam hi intermediate course group 1-te tan May 3, 5 leh 9-ah sawn a ni a, hei hi a hma chuan May 3, 5 leh 7 a ni. Intermediate course vek, group 2-te tan exam hi May 9, 11 leh 13-a neih tura ruahmanna siam tawh chu, May 11, 15 leh 17-ah sawn a ni bawk. ICAI hian final exam hi group 1-te tan May 2, 4 leh 8-a sawn a nih thu sawiin, final exam tho, group 2-te tan May 10, 14 leh 16 ruat a ni tih a tarlang bawk a ni.

ECI chuan kum 2024 Lok Sabha inthlan hi April 19-ah neih ṭan a nih tur thu puangin, thawh sariha neiin, June 4-ah vote chhiar a ni dawn a ni. Lok Sabha inthlan tur avanga exam ṭhenkhat hun sawn hi exam buatsaihtute chuan sorkarin chawlh a puan vang emaw, state sorkarin chawlh a puan vang pawha sawn theih a nih tawh loh thu an sawi.