DMK-in ONOE leh CAA hman loh an tiam

Tamil Nadu-a rorel lai, Dravida Munnetra Kazhagam (DMK) chuan 2024 Lok Sabha inthlan lo awm tur atana an party candidate turte an puang a, candidate puanna an neih rual hian One Nation, One Election (ONOE) leh Citizenship Amendment Act (CAA) hman ve loh an tiam.

Tamil Nadu chief minister leh DMK hruaitu, MK Stalin chuan Lok Sabha inthlan lo awm tur atana an party manifesto hi tlangzarhin,"Hei hi DMK manifesto mai ni loin, mipuite manifesto pawh a ni tel a ni. Kum 2014-a BJP-in sorkarna an siam khan thu tiam tam tak an nei a, engmah an tihlawhtling lo. Tunah hian INDIA kan din a, 2024-ah hian thlan tlin kan ni anga, kan hruaitu hmasate min zirtir angin, DMK chuan inthlan hmaa kan thu tiamte kan tihlawhtling ang," tiin, Tamil Nadu-ah chuan ONOE bakah, CAA leh Uniform Civil Code (UCC) hman a nih ve loh tur thu a sawi. MK Stalin hian PM Modi leh a kaihhruai sorkar chu paihthlak ngei an nih tur thu te sawiin, PM-in kumina Tamil Nadu ṭum ruk zet a lo tlawh chu, tuilian an tawrh laite ni zawk se a hlawkpui zawk ngei tur thu a sawi zui bawk.

DMK hian inthlan thu tiam atana an state-a ONOE, CAA leh UCC hman ve a nih loh tur thu an sawi bakah hian petrol leh diesel bakah, ei rawngbawlna gas man tihhniam te an sawi lang bawk. State puma a thlawna wifi hman theih tur buatsaih te, Puducherry tana state hran pek leh India ram puma medical college-a admission hmuhna tura buatsaih, National Entrance Eligibility Test (NEET) tihtawp te an tiam bawk a ni.

DMK hian 2024 Lok Sabha inthlan atan hian INDIA kaltlangin Congress an thawhpui a, Tamil Nadu-a Lok Sabha seat 39 aṭangin seat 21 an chuh tur thu hi puangin, Congress hian seat 9 an chuh ve dawn bawk a ni. Congress bakah hian an thawhpui party dang; VCK, CPM leh CPI te chuan seat pahnih ṭheuh an chuh dawn a, IUML, KMDK leh MDMK te'n seat pakhat ṭheuh an chuh ve bawk ang.