India-in China laka a ram hloh dan lantir nan kawng zawh dawn

Ladakh-a climate activist leh education reformer, Sonam Wangchuk chuan India-in China laka a ram a hloh tawhte lantir a nih theih nan, India leh China ramria kawng zawh tum a nih thu a sawiin, kawng zawhah hian Ladakh aṭangin mi 10,000 vel an tel tur thu a sawi.

Sonam Wangchuk hian Leh-ah amahin Ladakh union territory tana India constitution-a venhimna hran siam phutin, tui leh chi chauhin ringin a nuar mek a, ni 14 zet a nuar tawh a ni. Hetih lai mek hian India-in China laka ram a hloh tawh chungchanga nawrh huaihawt tum a nih thu hi a sawi a,"Beram vengtute hnen aṭanga kan hriat theih chu tun hmaa an beram an khalhna ṭhinahte khan an kal thei tawh lo tih hi a ni. A hmaa an beramte an kalpuina ṭhin thlen hma daih kilometre tam taka hlaah dan an ni a, ram hloh a nih leh nih loh hi kan fiah dawn a ni," a ti. Wangchuk-a tarlan danin March 27 hian nawrh huaihawt tum a ni a, he ni hi a rem lo a nih chuan April 7-ah neih a ni ang. Kawng zawh an tumna chin chu India leh China inrina, Line of Actual Control (LAC)-a Demchok, Chushul leh Finger area an tih, Pangong Tso ah te a nih thu a sawi lang bawk.

Sonam Wangchuk bakah hian Ladakh-a Buddhist leh Shia Muslim tam zawkte aiawh pawl; Leh Apex Body (LAB) leh Kargil Democratic Alliance (KDA) te chuan Ladakh tana state nihna pek leh, India constitution sixth schedule-a Ladakh dah an phut a, hemi chungchanga Home Ministry official-te nena inbiakna an neih tawhah erawh inremna an la nei thei lo a ni.