Sorkar hnathawk, OPS hman phutte'n nawrh an tum hun sawn

Sorkar hnathawk leh public sector hrang hranga thawk, Old Pension Scheme (OPS) hman leh duha intel khawm; Joint Forum for Restoration of Old Pension Scheme (JFROPS) chuan May 1 aṭanga tiam chin awm loa nawrh huaihawt an tum chu a hun sawn rih a nih thu an puang.

JFROPS hruaitute hian OPS hman chungchangah sorkar laipui official-te nen inbiakna an neih thu tarlangin, inbiaknaah hian union cabinet secretary, Rajiv Gauba leh union finance secretary, T.V Somanathan te pawh an tel thu an sawi a ni. JFROPS convener, Shiva Gopal Mishra chuan sorkar laipuiin OPS hman leh chungchanga thutlukna siam tura hun an mamawh belh thu leh, ngaichang rih tura an ngen thu a sawi. "State hrang hrang sorkar leh department hrang hrangte bia a, an ngaihdan la tura hun an mamawh belh thu an sawi a, an rawtna hi pawmin, nawrh kan tum hun sawn hi rem kan ti ta a ni," tiin Mishra chuan a tarlang. JFROPS hruaitute hian nawrh huaihawt an tum sawn a nih thu hi sawi mah se, sawn a nih hun erawh an tarlang lo a ni.

Sorkar laipui hian OPS hman leh chungchang zir chianna nei tur hian commitee a din a, hei hi union finance secretary, T.V Somanathan hian a kaihruai a ni. Somanathan hian JFROPS hruaitute nena inbiakna an neihnaah committee-in sorkar laipui hnena report an la theh luh theih loh chhante sawiin, sorkar hnathawkte pawh sorkar laipuiin committee a din chhan chu an thil phutte ngaihtuahna tur a nih tih hrethiam a, committee-ah rinna nghat ngam turin a chah a ni.