Ui breed lak luh khapna thuchhuah Karnataka HC-in a stay

Sorkar laipui hnuaia Animal Husbandry and Dairying Department-in March 12-a ram dang aṭanga ui kawlh leh hlauhawm chi 23, lak luh leh inthlah puntir khapna thuchhuah chu Karnataka High Court chuan stay rih a nih thu a puang. Karnataka high court hian sorkar laipui thuchhuah a stay chuan Karnataka state chiah a huam thu a tarlang.

Sorkar laipui thuchhuah khinna petition hi Bengaluru-a cheng, King Solomon David leh Mardona Jones te theh luh niin, Justice M. Nagaprasanna chuan petition hi a ngaihtuah a, sorkar laipui thuchhuah chungchangah hian ui chi ṭhenkhat lak luh khapna siam a nih hmaa zir chianna neitute zir chianna leh thil hmuhchhuahte theh lut turin sorkar laipui a hriattir a ni. Ui kawlh leh hlauhawm bik nia ngaihte lak luh leh inthlah puntir phal lohna thuchhuah hi Animal Husbandry commission kaihhruaina hnuaia mi thiam bikte zir chianna behchhana siam a ni a, thuchhuahah hian heng ui chi 23 te hi mihring tana hlauhawm nia ngaih an nih thu leh, hetiang ui neitute chuan an kap ching vek tur a nih thu thuchhuahah hian tarlan a ni bawk.

Petition theh luttu aiawha ding chuan, zir chianna nei tura committee dinah, ui chi ṭhenkhat lak luh khapin a nghawng tur hrang hrangte tel mah se, India ram hmun hrang hranga inbun leh kennel club certify awm chhun, Kennel Club of India chu râwn ve an nih loh thu a sawi. Justice M Nagaprasanna chuan thutlukna siam tura zir chianna neitute document zawng zawng en fiah leh a ṭul a ni, a ti ve bawk.