EC-in Whatsapp kaltlanga message thawn titawp turin MeitY hriattir

Election Commission of India (ECI) chuan Viksit Bharat chungchanga Whatsapp kaltlanga Ministry of Electronics and Information Technology (MeitY)-in message an thawn chhuah chu titawp turin a hriattir.

India mi tam tak, ṭhenkhat ram pawna awmte pawhin March 15 aṭang khan Viksit Bharat Sampark chungchang message chu Whatsapp kaltlangin an dawng a, Whatsapp business account verified, number hrang hrang hmang niin, message-ah hian Prime Minister Narendra Modi thuchah dah tel a ni. PM Modi-a thuchah an tarlanah hian sorkar laipui scheme hrang hrang ziah tel a ni a, mipuite hnen aṭanga rawtna siam tura ngenna bakah, GST, Article 370 hlih leh Triple Talaq chungchanga dan thar siam thu-ahte lawmthu sawina ziah lan tel a ni bawk.

Whatsapp kaltlanga hetiang message thawn chhuah hi Congress MP, Manish Tewari chuan Model Code of Conduct (MCC) bawhchhiatna a nih thu a sawi. MCC-ah chuan inthlan neih hun chhunga sorkar lai thil tihṭhat hmanga mipui hmaa mass media kaltlanga inpho lan chu khap a nih thu sawiin, MCC chu inthlan hun puan a nih ruala a nun nghal thu a sawi lang a ni. ECI hian MeitY hnenah hriattirna an pek hi an zawm ngei a ni tih report theh lut turin a ti bawk.