Arvind Kejriwal-a'n ED kohna Delhi High Court-ah a khing

Delhi chief minister leh Aam Admi Party (AAP) hruaitu ni bawk, Arvind Kejriwal chuan Delhi excise policy thubuai chhui lai meka Enforcement Directorate (ED)-in inlan tura an kohna chu Delhi high court-ah a khing. Kejriwal hian high court-ah hian thubuai kaihhnawiha a laka tihluihna hmanrua engmah hman ni lo se a duh thu a thlen a ni.

Delhi excise policy kaihhnawih thubuaiah hian ED hian thu zawh fiah tura inlan turin Kejriwal hi vawi kua zet an hriattir tawh a, Kejriwal erawh ED hmaah hian vawi khat mah a la inlan lo thung. ED-in thu zawh fiah tura inlan tura an hriattirna hnuhnung berah hian March 21 chu inlan hun tura an ruat a ni. Hetih lai hian Kejriwal-a'n ED a khinna hi nimin khan Justice Suresh Kumar Kait chuan ngaihtuahin, a laka tihluihna engmah a awm lohna turin court-ah hian a thlen a, Kejriwal-a aiawha ding, senior advocate, Abhishek Manu Singhvi chuan ED hmaa a inlan chuan an lo man chhunzawm mai an hlauh thu leh, venhimna pek a nih chuan ED hmaah hian inlan a hreh loh thu a sawi zui bawk.

Delhi excise policy thubuai kaihhnawihah hian AAP hruaitu, Sanjay Singh leh Manish Sisodia te chu man an lo ni tawh a, ED hmaa inlan duh loh avangin Arvind Kejriwal lakah hian complaint pahnih theh luh a ni tawh bawk. Kejriwal laka complaint theh luhah hian Additional Chief Metropolitan Magistrate of Rouse Avenue Court chuan Kejriwal hi bail-in a chhuah a phalsak thung a ni.