Delhi-ah Odd-Even phase II hmang ṭan

Delhi khawpui chhung boruak bawlhhlawh lutuk tihziaawmna tur atana sorkarin motor number kawpkim leh kawpkim lo a inthlanchhawk tirna, Odd-Even scheme chu a thawh hnihna atan nimin aṭang khan hman ṭan a ni leh ta. He scheme hi April 30 thleng hman a ni ang a, Pathianni erawh chu a huam lo ang.

Scheme hi a thawh khatnaah khan hlawhtling takin kalpui a lo ni tawh a, a thawh hnihna pawh a hlawhtlin leh ngei theih nan Aam Aadmi Party (AAP) sorkar chuan traffic police 2,000, enforcement official 580 leh civil defence volunteer 5,000 chuang chu kawngpuiah a duty tir.

Delhi Chief Minister Arvind Kejriwal-a chuan scheme chu a hlawhtlin theih nan Delhi mipuite chu sorkar thawhpui turin a ngen. He scheme hi a hlawhtlin ṭhat chuan a hnu zelah pawh hman leh ṭhin a nih tur thu a sawi bawk.

Odd-Even scheme thawh hnihna-ah hian school uniform nena inthuam, school naupang hruaitu car-te chu a huam lo ang. Hemi rual hian school naupangte chu car-a hruai an nih pawhin midangte nena inthurual a, a huhoa kal uar turin a chah. Natural gas phurtu motor, two-wheeler, hmeichhe khalh motor leh VIP motor-te a huam tel lo bawk.

Motor intlanchhawkna dan zawm lo chu Motor Vehicles Act, 1988 section 194 hnuaiah Rs 2,000 chawi tir an ni ang. He scheme kalpui a nih avanga mipui veivak ten harsatna an tawh lohna turin sorkar chuan ruahmanna a siam a, metro tlan zat chu ni khatah tihpun a ni a, pindan 30 belh a ni bawk. Sorkar chuan DTC bus tam zawk tlantir a tum bawk a ni.