SC-in Mayawati thubuai ngaihtuah remti

Supreme Court chuan BSP member hlui pakhatin BSF hotu leh Uttar Pradesh Chief Minister hlui Maywati chu a sum lakluh phu loa hausa nia puha FIR a thehluh thar chu ngaihtuah a remti.

Hetihlai hian a hmaa Mayawati chungchang lo chhuitu, Central Bureau of Investigation (CBI) Attorney General Mukul Rohatgi chuan Mayawati thubuai hi Income Tax Appellate Tribunal (ITAT) leh Delhi High Court-in an chingfel tawh a, tuna thubuai thehluh leh chu politic lama inbeihna lam zawk nia a ngaih thu a sawi.

ITAT hian BSP hotuin donation tam tham tak a dawng nia puhna chungchang chu a lo chhui tawh a, he puhna hi Delhi High court pawhin a hnawlsak a ni.

Kum 2012 Rajya Sabha inthlanpui neih dawna affidavit a thehluhah, Mayawati hausakna hi kum 1995-a cheng vaibelchhe 1.12 aṭangin cheng vaibelchhe 111.64-ah a pung a ni. Kum 2004 khan CBI chuan kum 1995-2003 inkara Mayawati sum lakluh dan hi an lo chhui tawh. Hemi chhunga a sum lakluh hi cheng vaibelchhe 1.12 nia chhut ni mah se, 1997-98 aṭanga 2002-2003 chhunga a chhiah pek chu cheng nuai 88.70 a tling a ni. Kum 2007 khan CBI chuan a hausakna chu cheng vaibelchhe 50 in a pung niin a sawi. Supreme Court-a affidavit thehluhah Mayawti hian kum 1998 leh 2003 inkar khan ram, in leh huan 96 a nei a, hei hi ama hming leh a chhung hnaite hmingin a dah niin a tarlang. Mahse Mayawati chuan a thil neihte chu amah duhsaktute hnen
aṭanga thilpek a dawn niin a sawi.