West Bengal inthlan thawh hnihna bial 56-ah nei

West Bengal Assembly inthlan thawh hnihna chu nimin khan constituency 56 ah nei a ni.

Inthlan thawh hnihna neihna hi district pasarih huam chhungah a ni a, Alpurduar district-ah bial panga, Jalpaiguri-ah pasarih, North Dinajpur-ah pakua, Darjeeling leh South Dinjapur-ah bial ruk ve ve, Malda-ah bial 12 leh Birhbum district-ah bial 11 an ni. Bial 56-ah hian candidate 383 awmin hmeichhe candidtate 33 an awm a, vote nei mi vaibelchhe 1.2 chuang an awm.

Kum 2011 assembly inthlanah khan heng bialah hian Trinamool leh a thawhpui Congress party chuan seat 18 ve ve an la a, Left Front chuan seat 15 a la. CPI-M, Revolutionary Socialist Party leh All India Forward Bloc-te chuan seat ruk, panga leh pali an la, Gorkha Janmukhti Morcha chuan seat thum lain independent-in seat hnih an la a ni.

Inthlan thawh hnihna, bial 56-a neihah hian rorellai, Trinamool Congress chuan bial 55 ah a chuh a, BJP-in bial 53, Congress 23, Left Front 34 leh GJM-in bial thumah an chuh.

April 14 khan Election Commission chuan Trinamool hotu leh Chief Minister Mamata Banerjee chu model code of conduct palzutah puhin hriattirna a lo pe tawh a, mahse CM chuan EC hriattirna pek hi cho letin, a ngam a nih chuan a chunga action la lurin a ti. Banerjee chuan result puan ni, May 19 ah an state mipuite chuan hriattirna an la pe let ve dawn a ni, a ti.

Nimina inthlan neihnaah hian venhimna khauh taka kalpui ni mah se, hmun ṭhenkhat≠ah chuan buaina a chhuak tho a ni. Birhum district-a Dumrut khuaah BJP leh TMC worker-te intibuaiin, mi pariatin hliam an tuar. Hliam tuarte hi BJP chuan an party mi leh sate vek niin a sawi. Forward Bloc chuan Sian leh Kankartala khuaahte an party agent-te chu Trinamool Congress chuan an vau niin an sawi bawk