Kashmir-ah sipai tirh belh

Jammu and Kashmir-a tunhnaia buaina chhuak vangin sorkar laipui chuan nimin khan venhim hna thawk turin paramilitary force 3,600 a tirh belh. State sorkar hnenah tharum thawhna thleng vanga thi an awm belh tawh lohna tura theihtawp chhuah turin a hriattir nghal bawk.

Kar kalta Thawhlehni aṭang khan Kashmir Valley-ah lungawi lohna lantira pungkhawm mipui leh security force-te inkara buaina chhuak vangin mi panga an thi tawh a ni. He thil thlen hnu hian hmun ṭhenkhatah curfew puan a ni.

Jammu and Kashmir tualchhung buaina chungchang ngaihtuaha Delhi-a high level meeting neihah sipai tirh belh hi an rel a ni. He meeting hi Union Home Secretary additional charge latu, Finance Secretary Ratan P Watal-an a kaihruai a, meeting-ah hian Intelligence Bureau, Ministry of Defence, Central Armed Police Forces leh Ministry of Home Affairs-a senior official-te an tel. Meeting chuan buaina chhuak vanga nunna chan an awm chu pawi an tih thu an sawi.

Venhim hna thawk turin sorkar laipui chuan Inrinni khan paramilitary force company 12 a lo tirh tawh a, nimin khan company 24 ten an thlen belh a ni. Company pakhatah hian sipai 100 zel an awm.

Home Ministry chuan J&K state official-te bepawpin, thil awmdan a thlithlai reng a, boruak muanawm a awm leh theihna turin state sorkar chu theihtawpa a thawhpui zel tur thu a sawi.

Meeting-ah hian kum 2015, November thlaa Prime Minister Narendra Modi-an Kashmir a tlawh ṭuma hmasawnna hna thawhna tura sum a pek chungchangte sawiho a ni bawk. He sum hi J&K-a hmasawnna hrang hrang kalpuina tur atana tih a ni a, tualchhung ṭhalaite tan hna tam tak a siamsak theih beisei a ni.