Mallya'n ED official-te la bepawp lo

Vijay Mallya chuan IDBI Bank loan cheng vaibelchhe 900 a puk a rulh theih loh chungchangah a dinhmun sawifiah turin Enforcement Directorate (ED) official-te a la bepawp lo.

Mallya hi March 18, April 2 leh April 9 khan court-a inlan turin hriattirna pe ni mah se a inlan lo a, midang kaltlang pawhin Directorate hi a be tlang lo a ni. Kar kalta Zirtawpni khan Ministry of External Affairs chuan Mallya diplomatic passport chu kar li chhung atan a lo suspend sak tawh bawk. Hemi rual hian a passport hnawlsak a nih lohna chhan tur chu kar khat chhunga sawifiah turina hriattir a, hei hi a chhang lo a nih chuan Mallya passport hi hnawlsak niin, ramdang a awm mek pawh dan loa awm a ni tawh dawn a, enforcement agency-ten an man thei tawh dawn a ni.

ED hian Mumbai court-ah Vijya Mallya laka non-bailable warrant (NBW) tichhuak turin a ngen a, hei hi court-in a remtihsak chuan ED hian Interpol hnenah Mallya laka Red Notice tichhuak turin a ngen thei dawn a ni. Hemi hmang hian India rama thawn luh a nih dan pawh ngaihtuah theih a ni ang.