China-ah Defence Minister a zin

Defence Minister Manohar Parrikar chu ni li cham turin Inrinni khan China-ah a zin. A cham chhung hian China ram hruaitute chu defence lama China leh India thawhdunna ṭha zawk siam dan turte a sawipui ang.

Parrikar hi kum thum chhunga China rama Indian Defence Minister zin hmasa ber a ni a, kum 2013 khan khatihlai Defence Minister AK Antony chu a lo zin tawh a ni.

Ni li a cham chhung hian China ram hruaitu leh Defence official-te a kawm dawn a, China Premier Li Keqiang pawh a hmu dawn a ni. China-in India nena an ramri enkawltu tura a dah Chengdu Military Area Command pawh a tlawh dawn bawk a ni.

Minister hian Air Indai flight hmangin Inrinni khan Shanghai a thleng a, Shanghai-a Indian Association-in inkhawm an buatsaih a hmanpui hnuin nimin khan Beijing a pan. Vawiin hian defence official-te nen meeting an nei ang.

Kum hnih kalta aṭang khan ram pahnihte hian defence lama an thawhdunna an tilian a, ram pahnihte hian ramri km 3,488-a thui, Line of Actual Control (LAC)-a buaina awm ṭhin sawiho leh buaipui turin Working Mechanism for Consultatin and Coordination an lo din tawh a ni.

National Security Advisor Ajit Doval pawhin 19th boundary talk nei turin China hi a tlawh dawn a, China security advisor Yang Jiechi nen an inbe dawn a ni. Doval leh Yang hi boundary talk-ah hian Special Representative atan ruat an ni.