ED-in Delhi CM Arvind Kejriwal an man

Delhi chief minister Arvind Kejriwal chu Ningani zan khan Enforcement Directorate (ED) chuan Delhi excise policy thubuai kaihhnawihah an man. Arvind Kejriwal hi India ram chief minister ni lai man hmasak ber a ni.

Kejriwal hi ED hian vawi eng emaw zat thu zawh fiah tura inlan turin an ko a, ED kohnaah hian vawi khat mah a inlan lo a ni. Ningani khan tihluihnaa man a nih loh nan Delhi high court-ah venhimna a dil a, hei hi high court hian hnawlsakin, ED hian Ningani zan vek khan a inah kal chilhin thu an zawt fiah a, darkar hnih zet thu zawh fiah a nih hnuah an man zui ta ni. ED hian Kejriwal hi nimin vek khan special court-ah hruaiin, a chungthu hi ngaihtuah a ni a, special court hnenah hian vawi tam tak inlan tura an hriattirna a zawm loh avanga dan zawm loah puhin, ni 10 chhung kawl chhunzawm an dil a ni.

Kum 2021 - 2022 chhunga Delhi-a zu zawrh dan chungchanga ruahmanna siamah, Aam Admi Party (AAP) hruaitu, Arvind Kejriwal hi pawisa chheprelh leh eiruknaa inhnamhawiha rinhlelh a ni. Man a nih hma hian nikumah AAP hruaitu zinga mi, Manish Sisodia leh Sanjay Singh te chu ED-te hian an lo man tawh bawk a ni. ED hian Delhi excise policy kaihhnawihah hian mi 16 zet man tawhin, pawisa leh thil dang, Rs. vbc. 128 hu an hreng mek bawk.

Delhi excise policy hi November 17, 2020 khan Delhi-a AAP sorkar chuan hmang ṭanin, a hmaa sorkarin zu zawrh a kalpui chu mimal leh sumdawng hnena license pe chhuakin Delhi-a zu zawrh dan phung thlak a ni. Hetianga zu zawrh dan phung leh license pek chhuah chungchangah hian kum 2022-a Delhi excise policy report-ah Delhi chief secretary chuan dan bawhchhiatna a awm nia tarlangin, hei hi Lt. Governor, VK Saxena chuan Central Bureau of Investigation (CBI) chhui turin thu a chhuah ta a ni. AAP sorkar hian he policy hi hnukdawk leh mah se, CBI hian AAP hruaitu eng emaw zat lakah thubuai an ziak lut a, CBI-in an chhui mek laiin pawisa chheprelh a awm nia sawiin, ED hi an inrawlh ve leh ta a ni.

Eptu party-te'n BJP an dem

Arvind Kejriwal man a nih chungchangah hian AAP hruaitu leh Delhi cabinet minister, Atishi chuan Kejriwal chu chief minister a la nih chhunzawm rih tur thu leh, a ṭul chuan tan in aṭanga ro a rel tur thu a sawi. Atishi hian an party hruaitu man a nihna sut a nih theih nan AAP-in Supreme Court-ah an thlen tawh thu a sawi bawk.

State hrang hranga AAP hruaitute chuan an party national convener chu an thlawp tlat thu an sawi hlawm a, eptu party hrang hrangte pawhin Delhi chief minister thlavang hauhna leh BJP beihna ṭawngkam an nei nghal a ni. Kejriwal-a thlawpna lantirtu zingah hian state hrang hranga eptu party-te an kim hle a, Kerala-ah chuan CPI(M) leh Congress-in nawrh an huaihawt bawk. Jammu & Kashmir-a National Conference hruaitu, Omar Abdullah chuan tan in aṭanga chief minister a ni chhunzawm a nih chuan BJP-in remchanga lain, Delhi chu President's rule-ah an dah mai a hlauhawm thu a sawi.

AAP-in 2024 Lok Sabha inthlan atana a thawhpui, INDIA pawhin thuchhuah siamin, ED-in Arvind Kejriwal an man chu an dem thu leh, Kejriwal-a an thlawp thu an sawi. BJP chuan eptu party-te chu tihchak loh a, an thuneihna hmanga inthlan lo awm leh tura chak an tum thu an tarlang. State hrang hranga eptu party hruaitute pawhin BJP chu inthlan lo awm tura chak loh hlauh avanga an hmanraw neih ang ang hmanga party dangte beiah an puh bawk a ni.

AAP-in nawrh an huaihawt

AAP chuan Ningani zana Arvind Kejriwal man a nih avang hian zanlaiah press conference koin, Kejriwal man an demna leh dodalna lantir nan nawrh an huaihawt tur thu hi an puang. Nimin khan state hrang hranga BJP leh ED office kawtah pung khawmin AAP chuan lungawi lohna an lantir a ni. Delhi Assembly ṭhut khawm, nimina neih tura ruahman pawh Kejriwal man a nih avang hian March 27-ah sawn a nih thu an puang zui bawk.

Party hruaitute hian state hrang hranga an party-te chu an awmna state ṭheuha BJP office kawta pung khawm turin an hriattir a, Delhi-ah pawh AAP lungawi lohna lantir avang hian venhimna tihchhah a ni. Nimin vek khan Delhi-a ITO metro station chu zing dar 8 aṭanga tlai dar 6 thleng khar a ni a, BJP leh ED office panna kawng zawng zawng pawh khar vek a nih thu traffic thuneitute chuan an tarlang. Delhi-a lungawi lohna lantira pun khawmnaah hian AAP hruaitu, Atishi leh Saurabh Bharadwaj te chu nimin khan man an ni bawk.