PM Modi-a'n Bhutan-a civil mi chawimawina sang ber dawng

Prime Minister Narendra Modi chuan ni khat cham turin nimin khan Bhutan-a Paro khawpui a thleng a, Bhutan-ah hian Order of the Druk Gyalpo an tih, Bhutan-a civil mi chawimawina sang ber hlan a ni dawn a ni.

Prime Minister-in chawimawina a dawn tur hi Bhutan sorkarin 2021-a a siam ṭan a ni a, he chawimawina siam a nih hnua PM-in Bhutan a tlawh lehna hmasa ber a ni. Chawimawina hi Bhutan lal, King Jigme Khesar Namgyel Wangchuck chuan a hlan dawn a ni. PM Modi hnena Bhutan-in civil mi chawimawina sang ber an hlan chungchangah hian Modi chu India leh Bhutan inlaichinna atana thawh hlawk tak a nih avang leh, kum 2021-a India-in Covid-19 vaccine dose khatna, Bhutan tana 500,000 zet a pek vang a ni bawk niin an tarlang.

PM Modi hian Ningani khan Bhutan a tlawh tur hi khaw chhia avangin a lo ṭhulh tawh a, mahse, boruak a ziaawm chhoh avangin nimin khan Bhutan hi a pan leh ta a ni. Modi-a'n Bhutan a tlawh hian mak tih a hlawh hle a, tihdan phungah chuan inthlan puan a nih tawh chuan PM-in ram dang an tlawh tawh ngai lo a ni. Mahse PM-in Bhutan a tlawh hi India-in a ṭhenawm ramte a ngai pawimawh a, a dah hmasa ṭhin tih lantirna nia ngaih a ni thung.