President-in bill a kawl tan chungchangah Supreme Court-ah Kerala sorkar a zualko

Kerala sorkar chuan state assembly-a bill a pass tawh pali, chhan leh vang engmah sawi awm si loa pawmpui loha President-in a kawl tan reng avangin Inrinni khan Supreme Court-ah a zualko.

Kerala sorkar hian Supreme Court-ah President Droupadi Murmu hian bill pali lai pawmpuina pe loin a kawl tang niin a tarlang a, pawmpuina pek a la nih loh chhan pawh hrilh an ni chuang lo niin a sawi. Hemi chungchangah vek hian Kerala Governor, Arif Mohammed Khan-a lakah pawh Kerala sorkar hian hun rei tak bill pasarih lai a kawl tan hnua President thutluknaa dah leh tur sia bill a tihkhawtlai avangin an zualko tel bawk. Kerala sorkar hian President-in chhan leh vang awm loa bill a kawl tan hi constitution-a article 14, 200 leh 201 te bawhchhiatna a nih thu sawiin, constitution zahna avang tal pawhin President-in bill a kawl mekte hi kan lak let a ṭul an ni, an ti. Bill kawl tan avanga Supreme Court-a an zualkonaah hian Secretary to president, Kerala Governor leh Additional Chief Secretary to the Governor te chu mawhphurtuah a ziak lang a ni.

State assembly-a bill an pass tawh, President-in pawmpuina a la pek lohte hi a ṭhen chu kum hnih a tlin ṭep tawh thu leh, ṭhenkhat chu kum khat la tling lo deuhte niin Kerala sorkar chuan a tarlang. Sorkar laipuiin bill pawmpuina pe lo tura President an fuih chu thil dik lo tak a nih thu leh, bill-te chu state sorkar thuneihna hnuaia awm liau liau a nih anga, constitution-in a kawhhmuh ang taka state sorkar thuneihnaa dah tura an duh thu petition-ah hian an tarlang.