Gujarat-ah Congress leh AAP thawk dun dawn

Congress leh Aam Admi Party (AAP)-te chuan 2024 Lok Sabha inthlan lo awm tura BJP-in rorelna nghet an nei anga ngaihna, Gujarat-ah BJP paihthlak an nih theih nan thawh dun an tum thu an puang.

Gujarat-ah hian Lok Sabha seat 26 awmin, Lok Sabha inthlan hi May 7-ah neih tur a ni dawn a, Congress leh AAP-te hian seat chuh tur insemin inremna an nei a ni. Inremna an siam ang chuan Congress hian seat 24 an chuh anga, AAP hian seat pahnih an chuh ve thung ang.

AAP hruaitu, Manoj Sorathiya chuan kum 10 zet Gujarat-a BJP-in ro an rel hnuah, mipuite'n sorkar thar atan hun siamsak a, thlan tlin an nih ngei an beisei thu a sawi. Congress thupuangtu, Manish Doshi pawhin, Congress leh AAP thawh dunna chuan BJP duh lotute vote darh tur a hui khawm theih tur thu sawiin, BJP an beih letna kawngah tun hma aia beiseina an neih san thu a sawi bawk.

Prime minister Narendra Modi leh union home minister Amit Shah-te chawr chhuahna Gujarat-ah hian kum 2014 leh 2019-a Lok Sabha inthlanah khan BJP hian seat awm zawng zawng, seat 26 an la fai vek ve ve a, vote tla zawng zawnga aṭanga 60% an hui bawk a ni. 2022 state assembly inthlan pawh khan seat 182 aṭanga seat 156 lain, BJP hian sorkarna an siam leh a ni. Heng inthlanahte hian Congress leh AAP-te hi thawk dun loin, a hranin seat an chuh a, hei vang hian Congress hruaitu pakhat chuan party pahnihte hian an nih tur ang an ni phak lo niin a sawi.