Arvind Kejriwal man dodalna lantirin INDIA-in kawng zawh dawn

Eptu party ṭangrual pawl, INDIA chuan Enforcement Directorate (ED)-in Delhi chief minister, Arvind Kejriwal an man avanga lungawi lohna leh dodalna lantir nan, March 31 hian kawng zawh (Maha rally) neih an tum thu an puang.

Aam Admi Party (AAP) leh Congress party hruaitute chuan Pathianni khan press conference neiin, AAP thlawpna lantir nan, March 31-a kawng zawh an neih tur thu leh, Delhi-a Ramlila Maidan-ah mipui pun khawm an buatsaih tur thu hi an sawi a ni. Kawng zawh hi India ṭhatna atan leh democracy humhim a nih theihna tur a nih thu press conference-ah hian an tarlang a ni.

Press conference-ah hian AAP Delhi Convener, Gopal Rai bakah, Delhi minister, Atishi leh Saurabh Bharadwaj te, Delhi Congress president, Arvinder Singh Lovely leh hruaitu hlun tak takte an tel.

AAP hruaitu, Gopal Rai chuan ram chhunga thil thleng hrang hrang an duh lohna lantir nana kawng zawh tur an nih thu sawiin, India rama party upa ber, Congress-in Lok Sabha inthlan atana an campaign theih loh nan bank account dansak an nih thu te a sawi. Rai hian Deendayal Upadhyay Marg-a AAP headquarters leh Arvind Kejriwal-a in pawh tlawhpawh theih lohin Delhi police-te chuan an dan thu a sawi a, "Delhi hi kulh angin an siam a, mipui thlan MLA leh Minister-te pawh an nawrh avangin man an ni a, Kejriwal-a chhungte pawh che thei loin an siam a, misual ang maiin min cheibawl a ni," tiin sorkar laipui chet dana an lungawi loh thu a sawi.