BWSSB-in ṭul lo taka tui hman avangin Rs nuai khat chawitir

Tui harsatna avanga buaina tawk mek, Bangalore khawpuia Bangalore Water Supply and Sewerage Board (BWSSB) chuan Cauvery lui leh tuichhunchhuah tuite chuangtlai taka hman a nih avangin mi 22-te chu pawisa a chawitir a, an pawisa chawi tling khawm hi cheng nuai khat a tling.

Tui an hman dan avanga BWSSB-in pawisa a chawitir zinga 12 te hi South east 1 division chhunga mite an ni a, South west 2 division aṭangin pathum an tel bawk. BWSSB chairman, Ram Prasath Manohar chuan,"Bangalore-in tui harsatna a hmachhawn mek dinhmun hi a ṭhat chhuah vat theih nana hma lain, ralpui phiarin kan phiar a ni. Beihpui thlakin dan kan zam a, thubuai ziah luh pawh a la awm belh zelin ka ring" tiin a sawi. Thuneitute chuan ren lo taka tui hmang, pawisa an chawitirte hian tui in tlaka ngaih chu motor sil nan leh huan tui pek nan an hmang niin an sawi a, rei lote hnuah chuan thil siamna hmun leh industry-te pawh ṭul lo taka tui hman a nih loh nan endik an nih thuai tur thu an sawi lang bawk. Bangalore-a thuneitute hian kar liam ta khan Holi lo awm tur denchhenin, tui hman dan tur chungchangah thupek an lo chhuah tawh bawk a ni.

Bangalore hian tui thianghlim in tur chungchangah harsatna a tawk mek a, Karnataka chief minister, Siddaramaiah chuan Bangalore-in ni tin tui MLD 2,600 a mamawh thu leh, hei hi MLD 500 zeta an phak loh thu a sawi. Tui harsatna hi in tur chauh ni loin, tui hman tur hrim hrim a tlem a, hei hi Karnataka bakah state ṭhenawm, Maharashtra leh Telangana pawhin an tuar a ni. Karnataka-ah hian tuichhunchhuah ang chi hi 14,000 a awm a, heng zinga 6,900 hi a kang tawh a ni. Bangalore-in ni tina tui an mamawh zat, MLD 2,600 aṭang hian MLD 1,470 hi Cauvery lui aṭanga an lak a ni a, MLD 650 hi heng tuichhunchhuah ang chi aṭanga an lak a ni thung.

Tui harsat chhan hi nikuma ruah tui tlak tlem vang niin an sawi a, ruah tui tla a tlem bakah hian heng lai biala lei chhungrila tui lo pai/khawltu (Aquifers)-te danglam vang niin an sawi bawk. Karnataka-ah hian nikum khan kum 15 chhunga ruah tui tlak tlem ber ṭum a thleng a, kum danga ruah tui an dawn ṭhin zat aia 18%-a tlem ruah tui an dawng a ni.