State-a hlankai phûtin Ladakh-ah chaw ngheiin an nuar

Ladakh tana state pek leh, India constitution sixth schedule-a dah ve phûta hun eng emaw chen sorkar laipui lo nawr tawh, Kargil Democratic Alliance (KDA) leh Leh Apex Body (LAB) te chuan an thil phutte nawr chhunzawm nan, Kargil-ah chaw ngheiin an nuar.

KDA leh LAB te hi politics, hnam leh sakhaw behchhan zawmtu hran ve ve nei ni mah se, Ladakh tana state pek leh constitution sixth schedule-a Ladakh dah luh ve phût hian sorkar laipui nawrin an inthurual a ni. An thil phûtte nawr nan hian Pathianni aṭang khan chaw ngheiin an nuar leh a, chaw ngheia nawrhna hi ni thum chhung neih tura ruahman niin, vawiinah a tawp ang. An thil phût zingah hian Ladakh tana Rajya Sabha seat pakhat pek leh, Ladakh ṭhalaite tan sorkar hnaa reservation siamsakte a tel bawk. Chaw ngheia nawrh huaihawtnaah hian KDA hruaitute zawng zawng bakah, Ladakh mipui, mi 200 chuang telin, Kargil-a Hussaini park-ah an pung khawm a ni.

Chaw ngheia nawrhna tel, KDA hruaitu, Asgar Ali Karbalai chuan sorkar laipui hnuaia home ministry hruaitute nen vawi tam tak an inbiak tawh thute, an inbiak hnuhnun ber, March 4-ah constitution-a Ladakh inhungbikna tur tlem dah bak chu state pek emaw, sixth schedule-a an dah theih loh tur thu an sawite tarlangin, an thil phûtte a hlawhtlin theih nan chaw ngheia sorkar laipui nawr chhunzawm mai chu an tihtheih a nih rih thu a sawi lang. Karbalai chuan chaw ngheia nawrh a tawp hnu, March 26 tlaiah hian district hrang hrang khawpuiah mipuite pung khawm tura an chah thu sawi bawkin, heta ṭang hian district tina hruaitute'n an kal chhunzawm dan tur an puan tur thu a sawi tel bawk.

Ladakh-ah hian education reformer, Sonam Wangchuk chuan March 6 aṭang khan Ladakh tana India constitution-a venhimna pek phûtin chaw ngheia nawrh a lo kalpui tawh a, hei hi KDA leh LAB te hian an thlawp thu an sawi. Sonam Wangchuk hian khaw vawt hnuaia chaw ngheia a nawrh chu ni 19 a tlin tawh thu leh, mi 5,000 chuangin an zawm tawh thu a sawi a, sorkar laipui chu rilru zau tak pu a, Ladakh mipuite rilru leh dinhmun ngaihtuah chunga thutlukna siam turin a ngen.