AAP-in Arvind Kejriwal chhuah phûtin kawng an zawh

Aam Admi Party (AAP) worker-te chuan nimin khan Enforcement Directorate (ED)-in an party hruaitu leh Delhi chief minister ni bawk, Arvind Kejriwal an man chu chhuah tura phûtin, prime minister Narendra Modi chenna in hual tumin kawng an zawh.

AAP-in PM chenna in hual an tum avang hian Delhi police-te chuan Code of Criminal Procedure (CrPC), section 144 puangin, PM chenna leh a chhehvelah hian pun khawm an khap nghal a ni. Delhi police-te chuan section 144 puan a nih bakah hian, PM chenna ina venhimna an tihkhauh thu tarlangin, traffic hotute lam pawhin AAP kawng zawh tum avanga lirthei chet dana ruahman an siam thu an sawi bawk. Delhi Deputy Commissioner of Police, Devesh Kumar Mahla chuan AAP-te chu kawng zawh tura phalna an pek loh thu sawiin, dan leh thupek ken kawh a nih theih nan PM chennaa venhimna an dah belh bakah Patel Chowk metro station pawh ven uluk zual a nih thu a sawi. Patel Chowk metro station bakah hian central secretariat metro station leh Lok Kalyan Marg station-te chu khar rih a ni bawk niin Delhi Metro Rail Corporation te chuan an tarlang.

Prime Minister chenna in hual tuma AAP mi leh sa pung khawmte hi Delhi police-te chuan an dang a, hruaitu ṭhenkhat chu man an ni bawk. AAP Punjab hruaitu leh Minister of School Education ni bawk, Harjot Bains te, Somnath Bharti te chu police-in an man zingah hian an tel a ni. AAP-te hian an party hruaitu man a nih chungchangah hian, an dodalna leh lungawi lohna lantir nan, an party media outlet-a an display picture zawng zawng chu tan in hungna hnunga Kejriwal-a awm lai lemin an thlak vek bawk a ni.

BJP-in Kejriwal bang turin an phût

AAP worker-te'n Kejriwal chhuah phuta kawng an zawh mek laiin, BJP worker-te pawhin Delhi-ah hian kawng an zawh ve bawk a, Arvind Kejriwal chu Delhi chief minister a nihna aṭanga bang tura an phût thu an sawi.

BJP worker-te hi Feroz Shah Kotla-ah pung khawmin, Delhi secretariat lam panin kawng an zawh a ni. Excise policy thubuai avanga tan ina awm mek, Kejriwal chu mipui hmai eng zahna avang tal pawha bang ngam tur leh, a mawhphurhna chu midang kuta hlan ngam tura an duh thu an aupui a ni.

Kawng zawhnaah hian BJP MP, Manoj Tiwari chuan thu sawiin,"Tan in aṭang chuan misual rual a kaihhruai theih a, sorkar erawh kaihhruai chi a ni lo. Sorkar hi constitution-in a phût anga kaihhruai tur a ni," tiin, Arvind Kejriwal bang tura a duh thu a sawi. BJP worker nawrh huaihawtte hnawh darh nan hian police-te chuan tui phuhnate an hmang a, Delhi BJP president, Virendraa Sachdeva chu police-te'n an man bawk.

AAP worker-te chuan Kejriwal hi tan in aṭang pawha chief minister ni chhunzawm tura an duh thu leh, midang kuta thuneihna hlan a ṭulna a awm loh thu an sawi thung. Delhi sorkar chuan chief minister man a nih avang hian harsatna a awm loh thu sawiin, mipui hamṭhatna tur scheme hrang hrang pawh a ngai anga kala, sem chhunzawm a nih tur thu an sawi ve bawk. Arvind Kejriwal man a nih duh lohna lantir nan hian AAP thawhpui, INDIA chuan March 31 hian Delhi-a Ramlila Maidan-ah mega rally neih an tum thu an lo puang tawh bawk a ni.