NCW-in ECI hnenah Congress hruaitu pahnih an hêk

National Commission for Women (NCW) chuan Congress hruaitu pahnih, Supriya Shrinate leh HS Ahir te chu BJP candidate, Kangana Ranaut chungchang mawi lo taka an sawi avangin an hêk.

BJP-in Lok Sabha inthlan lo awm tura an party candidate atan, Bollywood film star, Kangana Ranaut hi Himachal Pradesh, Mandi aṭanga seat chuh turin an puang a, hemi hnu hian Kangana chungchang hi social media lamah, Supriya Shrinate leh HS Ahir te hian mawi lo takin an sawi niin NCW chuan ECI hnenah hian an thlen a ni. NCW hian Congress hruaitute pahnih lakah hian action lak ngei an phût thu an tarlang.

NCW hian hmeichhe taksa leh lan dan chungchanga ṭawngkam neih chu hmeichhe zahawmna tihbawrhbanna a nih thu tarlangin, ram hruaitute tih atana mawi lo a nih thu an sawi bawk. Kangana pawhin post siam zui vein, politics-a mipa dinhmun leh hmeichhe dinhmun inthlauhna chu mak a tih thu leh, Congress chu mipat hmeichhiatna lam hawia mi an beih avanga zahthlak a tih thu a sawi.

Supriya Shrinate hian IG-ah Kangana thlalak hi post-in caption-ah Kangana thlalak duhdan leh hmeichhe taksa lang tam chungchang sawina a dah zui a, HS Ahir hian Twitter comment lamah Kangana Lok Sabha seat chuh tur hi mawi lo takin a sawi ve bawk a ni. Supriya hian a Facebook leh IG account chu mi tam takin an enkawlsak thu leh, Kangana chungchang post awm pawh hi a tira a hriatpui loh thu te, a hriat veleha a lak thlaktir nghal thu te a sawi a, post siamtu a zawn mek thu leh, ama enkawl anga Twitter account siam pawh a report tawh thu a sawi bawk.