INDIA-in nawrh huaihawt hun sawn; Delhi khawpuiah venhimna tikhauh

Eptu party intelkhawm, INDIA chuan Delhi chief minister leh Aam Aadmi Party (AAP) hotupa, Kejriwal man a nih avanga nimina Delhi-a nawrh huaihawt a tum chu March 31-ah an sawn.

INDIA hian Kejriwal man a ni leh electoral bond issue chungchanga lungawi lohna lantirin, Delhi-a Bharatiya Janata Pary (BJP) headquaters kawtah nawrh huaihawt an tum thu hi March 24 khan an lo puang tawh a ni. Mahse nawrh hun tur hi sawn lehin, March 31 hian Ramlila Maidan-ah joint rally an nei dawn tih an sawi.

AAP Delhi convenor, Gopal Rai chuan, "Tunlai kan ram chhung dinhmun ṭha lo tak duh lohna lantirin March 31 hian Ramila Maidan-ah rally puitham tak kan huaihat dawn a, he hunah hian INDIA block-a hruaitu langsar tak takte pawh an tel dawn a ni," a ti.

Eptuten nawrh huaihawt an tum thu an lo sawi lawk tawh avangin, nimin khan Delhi khawpuiah venhimna pawh tihkhauh a ni a, BJP headquarters panna kawngpui hrang hrangte chu police ṭhahnem takin an lo veng lawk vek a ni. Police bakah paramilitary force-te pawh hmun tam takah duty tir an ni bawk. Delhi Police chuan nawrh huaihawt hma hian BJP headquarters awmna, DDU Marg leh a chhehvel bialah mi tam tak punkhawm khapna, CrPC Section 144 an puang bawk.

Delhi excise policy thubuai kaihhhnawiha Enforcement Directorate (ED)-in March 21-a an man, Arvind Kejriwal hi ED-in an kawl theih chin hi court chuan April 1 thleng a pawhsei sak bawk.

Kejriwal man chungchangah UN ṭawngchhuak

United Nations chu Lok Sabha inthlanpui neih dawn hnaia Delhi CM Arvind Kejriwal man a nih chungchangah ṭawng chhuakin, India rama mi mal tinte political leh civil rights chu venhimsak an nih theih a beisei thu a sawi.

UN Secretary-General Antonio Guterres thupuangtu, Stephane Dujarric chuan Kejriwal man a ni leh, eptu party Congress Party bank account khawih chet theih loha hreksak an nih chungchanga zawhna chhangin,"India ram leh, inthlan neihna tur ram dangah pawh, mitinte dikna chanvo neihte humhalh sak a nih kan beisei. Boruak ṭha leh inthleina engmah awm lo karah mi tinin vote an thlak theih kan duh a ni," a ti.

Hemi hma hian US sorkar pawhin ED-in Kejriwal an man leh, Congress party bank account hrek sak an nih chungchangah hian zawhna a lo siam tawh a, Delhi CM man a nih dan a sawiselna avangin sorkar laipui chuan Nilaini khan US senior diplomat chu koin, a thusawi dana an lungawi loh thute pawh an hrilh.