Congress-in IT notice dawng leh

Lok Sabha inthlanpui neih tura inbuatsaih chhoh a nih mek laiin, eptu party hrang hrangte chuan thuneitute lam aṭangin harsatna an tawk chho mek. Congress party pawh an bank account khawih chet theih loha hreksak an nih hnuah, nimin khan Income Tax department aṭangin kum eng emaw zat kalta chhunga chhiah pek dan fel tawk loa nia sawi chungchangah notice dawngin, Rs vbc 1,823 chawi tura hriattir an ni.

Congress party treasurer Ajay Maken leh general secretary Jairam Ramesh-te chuan IT department aṭanga notice an dawn thar leh thu hi nimin khan an sawi. Tun kar tir lam khan notice hi an lo dawng tawh bawk. Hriattirna an dawnah hian, kum 2017-18 atanga 2020-21 chhunga chhiah an pek dan fel tawk lo, langtlang tawk lo nia puhin, hemi chhunga an chhiah pek tur leh a pung nen, Rs vbc 1,823 chawi tura tih an nih thu an sawi.

AICC headquaters, Delhi-ah nimin khan press conference koin, Ramesh chuan BJP chet dan chu 'tax terrorism'-a inhnamhnawihna a ni, a ti. Electoral bond scam hmangin, BJP hian Rs vbc 8,200 vel an la khawm tawh a, hengte hi company thamna atante an hmang a ni, a ti. IT department-in notice a pek chungchang hi kar leh lamah Supreme Court-ah khin let an tum tih Malen chuan a sawi bawk.

Hemi hma hian Income Tax lam hian Congress party hi Rs vbc 210 chawi tura tiin, an party fund pawh khawih chet theih lohin an hrek sak mek a ni. High Court-ah khing let mah se, awmzia a awm lo a, hei vang hian Supreme Court lamah thlen leh a tum. Congress chuan BJP chu April 19 aṭanga Lok Sabha inthlanpui neih turah, an party fund-te hmang thei loa hrek bet tura IT department thuneitute lam thunun leh hmang ṭangkaiah an puh.