Bihar-ah Mahagathbandhan in seat insem dan tur puang

Bihar-a Rashtriya Janata Dal leh Congress party kaihhruai ṭangrual, Mahagathbandhan chuan Lok Sabha inthlanpui neih tura an state-a seat chuh tur an insem dante nimin khan an puang.

State RJD headquarters-ah RJD, Congress leh Left party pathum hotute chuan an seat insem dan tur hi an puang a ni. Bihar-ah hian Lok Sabha constituency 40 awmin, heng aṭang hian RJD chuan seat 26-ah an chuh dawn a, Congress-in seat 9, a bak seat 5 chu Left party-ten insemin, Communist Party of India (Marxist-Leninist) -in seat 3, Communist Party of India (CPI) leh Communist Party of India (Marxist) (CPI-M) in seat khat ve ve an chuh ang.

Kum 2019 inthlanpuiah khan Congress-in seat khat an la a, a bak seat 39 chu BJP kaihhruai NDA lamin an hui vek a ni.

Mahagathbandhan-a an thawh hona hnuaiah, RJD hian an ṭhenawm Jharkhand-ah pawh Lok Sabha seat pakhatah an chuh ve dawn bawk a ni.

All India Majlis-E-Ettehadul Muslimeen (AIMIM) chuan Bihar-ah hian seat 16 an chuh dawn tih an puang ve bawk.