UP Police-in Priyanka leh Rahul Gandhi lakah thupha chawi

Uttar Pradesh police chuan Congress hruaitu  Priyanka Gandhi Vadra leh Rahul Gandhi-te chungah thupha an chawi. 

Priyanka leh Rahul Gandhi-te unau hi an party worker ṭhenkhat nen Hathras-a pawngsual rawn tawktu chhungte hmuh tuma an kal chu police-te hian lo dangin, an innawrna lamah kut pawh an tuar tel a ni. He thil thleng hi pawi an tih thu sawiin, UP police chuan chhui chian a ni dawn tih an sawi bawk.  

Gandhi-te unau hian kar liam ta Inrinni  khan pawngsual rawn tawktu chhungte hi an hmu a, rorelna dik an hmuh theih nan an party chuan state chhunga district  headquarters tinah 'satyagraha' an neih tur thu an sawi. 

AICC general secretary, Organisation, KC Venugopal chuan  pawngsual tawktu hian a dam lai leh a thih thlengin rorelna dik a hmu lo a ni tiin, pawngsual rawn a tawh avangin a nunna a chan phah a, a thih hnuah pawh a chhungte remtihna telloin a zan la lain a ruang hi halral  nghal a ni, a ti. Midang lainatna telloa UP-a BJP sorkar rorel dan chu an dem tak zet thu leh, vanduaina tawktu leh a chhungte tan rorelna dik an phut tih a sawi a ni.