Eptu party-te'n Delhi-ah 'Loktantra Bachao' maharally nei

Eptu party ṭangrual pawl, Indian National Developmental, Inclusive Alliance (INDIA)-te chu nimin khan Delhi-a Ramlila maidan-ah pung khawmin, BJP kaihhruai sorkar laipuiin a hnuaia agency hrang hrang a hmang dik lo ṭhin leh, Delhi chief minister, Arvind Kejriwal man a nih an duh lohna an lantir.

Maharally neih a nih chungchangah hian Congress party chuan an pun khawm chhan chu a hming an phuah, Loktantra Bachao a nih anga mi pakhat chhan duh vang ni loin, India constitution leh democracy venhim a nih theih nana pung khawm an nih thu an sawi. Maharally hi INDIA-a tel party hrang hrangte thawhhona ṭha lantir a tum bakah, hnathawh tur nei lo pung zel te, hausa leh rethei inkar zau lutuk te, loneitute laka rorelna dik lo tak a thlen avang leh, thil man sang zel te avanga lungawi lohna lantirna a ni bawk a ni.

He rally-ah hian Enforcement Directorate (ED)-te'n an hren mek, Delhi chief minister, Arvind Kejriwal-a nupui, Sunita Kejriwal chuan tan in aṭanga Arvind Kejriwal-a thuchah a chhiar chhuak a, Lok Sabha inthlan lo awm tur atana Delhi tana a thil tumte ziakin, chung zingah chuan; Delhi tana state nihna pumhlum pek te, India mipui zawng zawngte tana healthcare siam te, ram pum tana nileng zankhuaa êng pek chhuah theih te, mi rethei zualte tana a thlawna êng pek te, khaw tina sorkar sikul ṭha tak din bakah, loneitute tana Swaminathan Commission report anga an thlai thar man pek theih te a tel.

Loktantra Bachao rally-ah hian eptu party hruaitu langsar tak tak; AAP hruaitu eng emaw zat bakah, Congress aṭangin Mallikarjun Kharge leh Rahul Gandhi, Bihar-a NCP hruaitu Sharad Pawar te, Maharashtra-a Shiv Sena (UBT) hotu, Uddhav Thackeray te, UP-a Samajwadi Party Akhilesh Yadav, CPI (M) hotu, Sitaram Yechury, Jharkhand CM, Champai Soren leh Jammu & Kashmir-a PDP hruaitu, Mehbooba Mufti te an tel a ni.