Sorkar laipuiin NGO ṭhenkhat FCRA nun hun chhung a pawtsei

Ministry of Home Affairs (MHA) chuan ram chhunga Non-Government Organisation (NGO) leh pawl hrang hrangte'n ram dang aṭanga ṭanpuina sum dawng thei tura registration an tih ṭhin; Foreign Contribution (Regulation) Act (FCRA) thi hnai tawh leh thi tawhte pawh, registration tihnun nana hun pein, an registration neih sa dam hun chhung chu June 30, 2024 thleng a pawtsei.

MHA-in thuchhuah an siamah, NGO leh pawl ṭhenkhat, an FCRA registration thar tih nana hun pawhseisak tawhte chu June 30, 2024 thleng hun pawhsei a ni a, registration thar tih ngai zawng zawngte pawh June 30,2024 thleng emaw, renew an dilna tihfel a nih hnu, a hun thleng hmasa zawk ringa chumi chen chu an registration a la nung bawk ang, tiin an tarlang. "FCRA registration tihnun thar diltute chuan an dilna hnawl a nih chuan hnawl a nih ni aṭangin an FCRA registration a tawp nghal tih an hre tel tur a ni a, FCRA ti lo NGO leh pawlte chuan ram dang aṭangin sum faia ṭanpuina an dawng thei dawn lo a ni," tiin an sawi bawk.

MHA hian September 29, 2020-a an FCRA thi tawh pawl eng emaw zat chu kum 2020 aṭang khan registration an tihnun nan ṭum kua zet hun a lo pawhseisak tawh a, hei hi registration tihnun dilna a kal muan vang niin an sawi.

FCRA hi ram dang aṭanga ṭanpuina sum dawng tura phalna a ni a, kum nga danah tihnun ziah a ngai a ni. MHA hian NGO 6,000 zet chu FCRA registration an tihnun dilna hnawlin, January 1, 2022 khan a lo titawp tawh a, kar hmasaa thuchhuah an siam hnuhnun bera tarlan a nih danin FCRA registration nei NGO hi 16,412 an awm a, hetih lai hian December 2021 khan 22,000 an awm a ni.