Hna lem hmanga bum Indian 250 Cambodia aṭangin chhanchhuak

India mi, hnathawk tura Cambodia-a kalte chu bum an nih thu leh, an sawi ang hna ni loa hna dang an thawh thu hriat a nih hnuah Ministry of External Affairs (MEA) chuan chhanchhuah an ni tawh thu leh India rama hruai let an nih tawh thu an puang.

MEA thuchhuaha tarlan a nih danin, India mi 250 zet chu Cambodia-ah hian hnathawh tura awma hrilh an nih avanga an kal thu leh, heng mite hi dan kalha thil kalpui, cyber lam kaihhnawih hna thawhtir an ni tih hriat a ni a, an zinga mi 75 vel hi thla hmasa lama chhanchhuah an ni tawh. "Media lam tarlan dan anga Cambodia-a kan mi leh sate chhawr luih leh an tangkhan mek thu hriat a ni a, Cambodia ram thuneitute nen inbiain, ruahmanna fel tak siam a nih hnuah Cambodia aṭang hian lak chhuah an ni thei ta ni," tiin, MEA thupuangtu, Randhir Jaiswal chuan a sawi.

Sorkar laipui chuan Indian hnathawh tur zawng, mi 5,000 chuang zet chu Cambodia-ah hian bumna hmanga hruai an nih thu leh, haw thei tawh si loa tihluihnaa chhawr an nih thu an sawi a, thla ruk liam ta chhunga heng inbumna kaihhnawiha pawisa kal ral zat chu Rs. vbc. 500 zet a nih bawk avangin ram pahnihte hian thawh dun an rel ta niin an tarlang. Report ṭhenkhata tarlan a nih danin India rama bum tawkte hi Cambodia-a Indian-te vek hi an ni.