FCI godown-a foodgrain dah ton 1,550 a chhia

Ministry of Consumer Affairs data-in a tarlan dan chuan Covid-19 vanga lockdown puan chhungin Food Corporation of India (FCI) godown-a foodgrain dah ton 1,550 a chhia.  

Kumin March 25 aṭanga May 31 thleng khan ram pumah lockdown puan a ni. Thla hnih chuang lockdown puan vangin inhlawhfaa awm mi tam tak ei tur tlachhamin rilṭamin an awm a, hetih lai hian godown-a chaw lam chi chhehkhawl tam tak erawh chu a lo chhe thung a ni. 

Ministry data-a a lan danin, FCI godown-a foodgrain chhehkhawl hi May thla khan ton 26 dawn a chhia a, June thlaah tone 1,453 chuang, July-ah ton 41 leh August-ah ton 51 a chhia a ni. 

Nikum nena khaikhinin kumina godown-a foodgrain chhia hi a tam hle. Nikum April-June thla chhung khan ton 100 vel a chhiat laiin, kumina hetiang hun chhunga chhia chu ton 1,500 dawn a tling thung.