IAF Chief RKS Bhadauria a ṭawng huai

Air Chief Marshal RKS Bhadauria chu nimin khan a ṭawng huai hle a, Rafale fighter aircraft an neih thar chuan a tihphuisui thu sawiin, 'two-front war' atan pawh an inpeih hle tih a sawi.

Rafale indo thlawh­theihna chuan IAF a thuam chak hle tih leh na taka bei hmasa zawk thei turin theihna a siam sak tih a sawi. "Kum nga lo awm leh turah chuan 83 LCA Tejas Mark 1A neih belh a ni leh dawn a, HTT-40 trainer aircraft leh Light Combat Helicopter pawh neih belh a ni dawn bawk," tia sawiin Indian Air Force chu 'two-front war' hmachhawn tur pawhin an inpeih tawh hle a ni, a ti.

China leh Pakistan nena ramri inchuh mek kara hetiang thu IAF chief-in a sawi chuan ngaihven a hlawh hle.

"China-in May thlaa Ladakh-a a thiltih kan hmu. Hriat a nih velah Indian Army leh Air Force chu an che chhuak nghal a ni," tia sawiin India Today TV-in an kawmnaah Pakistan leh China chu an thawkdun mek tih leh exercise-te pawh an nei ho tih a sawi bawk. Pakistan chu China-ah a innghat thui hle tih a sawi a ni.

Hmun pawimawh zawng zawngah chuan an indah kim a, Ladakh chu hmun te tak te zawk a ni. Kan position pawh a fuh a, buaina chhuak thut thei lakah kan inralring a ni, a ti. 

October 8-a Air Force Day parade-ah Rafale fighter aircraft hi pholan a ni dawn. September 10 khan Rafale fighter aircraft panga chu IAF hian a lalut a ni.