CBI-in DK Shivakumar chenna in dapsak

Central Bureau of Investigation (CBI) chuan nimin zing khan Karnataka Congress chief DK Shivakumar chu eiruk thubuai vangin, Karnataka, Mumbai leh Delhi-a a chenna leh amah kaihhnawih  hmun dang an dapsak. 

CBI hian nimin khan hmun 14-ah DK Shiva­kumar thubuai chhuihna hi an dap a, Karnataka-ah hmun kua, Delhi-ah hmun li leh Mumbai-ah hmun pakhat chu an dap a ni. 

Enforcement Direc­torate (ED)-in vawi tam tak Shivakumar pawisa tihchingpen chungchanga chhui hna an thawhna report behchhanin, eiruk thubuai hi CBI chuan an siamsak a ni.

Nimin zing dar 6:30 vel khan hmun 14-te hi CBI chuan an dap a, heng hmun 14 aṭang hian cheng nuai 50 an hmuchhuak a ni. Hemi chungchangah hian eptute chuan November 3-a by-election neih a nih dawn vangin Karnataka-a sorkar lai BJP chuan Shivakumar beih nan hian CBI an hmang niin sorkar an puh.

Nikum khan ED chuan kum 58 mi Shiva­kumar hi an lo man tawh a, ni li chhung chu pawisa tihchingpen chungchangah thu an zawtfiah a ni. Kum 2017 August 2 khan Shivakumar chenna in leh Bengaluru-a a office chu dan loa chhiah awlruk chungchangah Income Tax Department chuan an lo dapsak tawh a, cheng vaibelchhe 8.6 chu an dapnaah hian an hmu a, heng pawisa tam tham tak hi Income Tax Return-a a ziak lan loh avangin tax-a awl ruknaah an puhsak a ni. Hei vang hian nikum September thla khan man a ni. 

A hmaa Income Tax depart­ment-in chargesheet an thehlut chu umzuiin kum 2018 khan ED chuan money laundering case an siam sak tawh bawk.