Arvind Kejriwal jail-ah dah a ni

Delhi excise policy thubuai avanga Enforcement Directorate (ED)-in an man, Delhi chief minister, Arvind Kejriwal chu ED-in hun eng emaw chen an kawl hnuah nimin khan Tihar jail-ah dah luh a ni.

ED-in an kawl theih hun chhung tura court-in phalna a pek hi nimin khan a tawp a, Delhi rouse avenue court-ah nimin zing khan Kejriwal hi hruai a ni. ED-te hian court-ah hian Kejriwal chu an thu zawh fiahnaah chhanna pe mumal lo a, a khawl thil vela password engmah a pe duh lo niin an sawi a, hei vang hian court chuan Kejriwal hi April 15 thleng Tihar jail-a dah tur a nih thu a puang ta a ni. Court hian Kejriwal hi a nupui Sunita Kejriwal leh minister pahnih, Atishi leh Saurabh Bhardwaj te hmuh a phalsak bawk. Kejriwal-a ukil chuan a taksa lam hriselna ngaihtuahna avangin jail-ah hian damdawi leh ei tur buatsaihsak bik a dil a ni.

Man a nih chungchangah hian Kejriwal hian Delhi high court-ah dan kalh a ni tiin a khing let a, hei hi court hian ngaihtuahin, ED-te chu insawi fiahna theh lut tura hriattirin, naktuk hian ngaihtuah chhunzawm leh a ni ang. Delhi High court-a ED-in an man a khinna ngaihtuah a nih lai hian Kejriwal hian thil sual a tih fiahna engmah a awm loh thu leh, CBI leh ED-te chuan thubuai ziahna phek tam tak buatsaih mah se, an thubuai ziahte chhiar pawhin man a nih chhan hi hriat theih a ni lo a ni, tiin a sawi.

Arvind Kejriwal hi March 21 khan Delhi excise policy thubuai kaihhnawihah ED hian an man a ni. India rama chief minister ni lai man hmasak ber a ni.