IT department-in Congress chhiah chawi tur tipung

Congress party chuan Income Tax department hnen aṭanga an chhiah chawi tur tihpunna an dawn thu tarlangin, chhiah an chawi tur zawng zawng zat chu Rs. vbc. 3,568 a tlin tawh thu an sawi.

Income Tax depar­tment-a thuneitute hian political party-te tana chhiah awl theihna hi an titawp tawh a, political party zawng zawngte chu an thil neih aṭanga chhiah chawi turin a lo hriattir tawh a ni.

Congress hian IT department aṭanga chhiah tihpunna hriattirna an dawn hi puangin, a hmaa chhiah chawi tura an tuk zat chu kum 2014-2015 leh 2016-2017 lak kawpin, Rs. vbc. 1,745 a nih thu leh, tunah hian Rs. vbc. 1,823 chawi belh tura hriattir an nih thu an sawi. IT department-in Congress chhiah chawi belh tur zat an hriattirnaah hian kum 2014-2015 atan Rs. vbc. 663, 2015-2016 atan Rs. vbc. 664 leh 2016-2017 atan Rs. vbc. 417 niin tarlan a ni. Congress hian IT department chuan an party account aṭangin kum hmasa lama an chhiah chawi tura chhut tawh aṭangin Rs. vbc. 135 an lak tawh thu an sawi. Hei bakah hian party mi, mimal anga eizawnna leh sum hnar hran neite chu party hminga chhiah chawi tura bitukah hian an chhut tel niin Congress chuan an tarlang bawk.

IT department-in an account aṭanga chhiah chawi denchhena Rs. vbc. 135 an lak avang hian Congress chuan thubuai an theh lut a, hei hi Supreme Court-in a ngaihtuah dawn a ni. An party chhiah chawi chungchangah hian Congress hi High Court leh Income Tax Appellate Tribunal-ah te an kal tawh a, mahse, hriatthiamna an hmu lo thung. Party mi, an hausakna chhuta party hminga chhiah chawitir chungchangah pawh Congress chuan chutiang mi chu BJP-ah pawh an awm thu leh, chhiah chawitir ve an nih loh an sawi lang a, BJP chu kum 2024 Lok Sabha inthlan lo awm tur atana party dangte hrek dan kawng dik lo taka zawng leh, inelna rualkhai lo siam tumah an puh bawk a ni.