INDIA-in ECI hnena an thil phût panga Maharally-ah puang

Ramlila maiden, Delhi-a eptu party ṭangrual pawl, Pathiannia Loktantra Bachao hming vuaha maharally nei chuan Election Commission of India (ECI) hnenah Lok Sabha inthlan lo awm tur atana an thil phût panga an puang.

Rally-a kal khawmte hmaah hian Congress party hruaitu, Priyanka Gandhi Vadra chuan INDIA party-te'n EC hnena an thil phut hrang hrang panga puanzarna a nei a, heng zingah hian eptu party-te sum hnar dansak tihtawp te, Enforcement Directorate (ED) emaw, Central Bureau of Investigation (CBI) leh Income Tax department-te emaw kaltlanga hmalak ṭhin tihtawp an duh thu te, BJP-in electoral bond hmanga sum tam tak an neih vil nana Supreme Court kaihhruai Special Investigation Team din leh, party zawng zawngte tana inthlan chuh tura dinhmun inang tlanga campaign neih theihna tur boruak siam an duh thu te a sawi a ni.

Maharally-ah hian INDIA-a thawkho eptu party hrang hrang hruaitute an tel a, central-a sorkar lai, BJP chu sorkar laipui hnuaia agency kaltlanga eptu party-te bei leh hrekah puhin, India ram democracy dinhmun chu a derthawng hle niin an sawi. Eptu party-te hian Delhi chief minister, Arvind Kejriwal leh Jharkhand chief minister, Hemant Soren te chhuah an phût thu an sawi bawk.