BJP-in election campaign hawnna hun hmang

Central-a sorkar lai, Bharatiya Janata party (BJP) chuan Pathianni khan union home minister Amit Shah kaihhruaina hnuaiah Rajasthan-a Sikar hmunah road show neiin, kum 2024 Lok Sabha inthlan lo awm tur atana an party election campaign hawnna hun an hmang.

Union home minister, Amit Shah hi Rajasthan chief minister, Bhajan Lal Sharma leh Sikar-a BJP candidate, Swami Sumedhanand-te'n an ṭawiawm a, campaign hawnna road show neihah hian thirsakawr leh rimawi band hrang hrang bakah sakawr chung chuang, sanghawngsei leh lirthei chei mawite'n kawng an zawh a ni. Road show hi Shri Kalyan temple aṭanga ṭan niin, Tapriya Bagichi-ah tihtawp a ni. Campaign hawnna road show neih a nih zawh hian Shah hian party hruaitute chu election campaign kalpui dan tur chungchang sawipuiin, party worker tam thei ang berin tel ve nihna an neih theihna tur atana ruahmanna siam turin a chah bawk.