ED-in AAP hruaitu dang man zel an tum thu Atishi-i'n a sawi

Arvind Kejriwal-a ṭhian hnai tak, Delhi cabinet minister leh Aam Admi Party (AAP) hruaitu ni bawk, Atishi chuan BJP an zawm lo a nih chuan Enforcement Directorate (ED)-in thla khat chhunga AAP hruaitu dangte pawh man vek an tum tih a sawi.

Atishi hian Delhi-ah press conference neiin, BJP chuan AAP chu tihdarh tumin, hruaitute jail-a dah chu an thil tum tihhlawhtlinna pakhat a nih thu a sawi a, hei vang hian tun aṭanga thla hnih chhungin ED-te chuan amah bakah AAP hruaitu ṭhenkhat, Saurabh Bharadwaj, Durgech Pathak leh Raghav Chadha te in dapin, thu zawh fiah turin an man dawn nia hriattir a nih thu a sawi. Hemi rual hian BJP chu an hlauh loh thu leh, Arvind Kejriwal-a sipai leh Bhagat Singh zuitu an nih anga mahni ram chhan nana an beih zel tur thu a sawi. "Ka politics zinkawng a tawp mai loh nan BJP zawm turin sawm ka ni a, BJP ka zawm lo a nih chuan thla lehah man ka nih tur thu min hrilh a ni," a ti.

AAP hian BJP hi Delhi-a President's rule puan tuma hma laah an puh a, hemi atan hian AAP tidarh a, hruaitute beiin bul an ṭan a ni, an ti. AAP MLA, Rituraj Jha pawhin BJP-in Rs. vbc. 25 tawktarh a, an party-a lut tura an thlem thu a lo sawi lang tawh bawk.

Hetih lai hian Delhi excise policy case kaihhnawih veka man, AAP hruaitu Sanjay Singh chu himin khan Supreme Court-in bail a dilna a phalsak. Judge pathum awmna bench chuan nimin khan Singh-a'n man a nih chungchang a khin letna ngaihtuahin, bail a dilna chu an remtihsak a ni. Singh hi nikum October 4 khan ED-te'n an man a ni.