RSS-in Pakistan Hindu-te tan CAA hmanga khua leh tui nihna dil tura hriatpuina lehkha pe chhuak

Rashtriya Swayamsevak Sangh (RSS) hnuaia awm leh an hriatpui pawl pakhat; Rajasthan-a Seemajan Kalyan Samiti te chuan Pakistan-a Hindu sakhaw vuantute tan Citizenship Amendment Act, 2019 (CAA) hmanga India khua leh tui dil theihna tur certificate an pe chhuak.

Seemajan Kalyan Samiti te hi Rajasthan-a Pakistan ramri bul hnaiah inkulhin, camp an buatsaih a, heta ṭang hian Jaisalmer, Barmer leh Jodhpur aṭangin mi 330 vel chu CAA hnuaia India khua leh tui nihna dilna tura union home ministry-in a buatsaih, website-a document upload kawngah te an pui a ni.

CAA hian khua leh tui nihna dil turte tana certificate theh luh tur zingah dilna theh luttu chenna hnaia sakhaw biakna hmun hlun leh hriat hlawh leh tak aṭanga hriatpuina lehkha a phut tel a, hei vang hian dilna theh lut turte hriatpuina lehkha hi Seemajan Kalyan Samiti chuan an pe chhuak a ni. He lehkha hian khua leh tui nihna diltu chu eng sakhaw vuantu nge a nih a tichiang dawn a ni.

Seemajan Kalyan Samiti hruaitu, Vikram Singh Rajpurohit pawhin an pawl chu sorkar hriatpuina nei an nih anga certificate pe chhuak thei an nih thu leh, chutiang anga taka hriatpuina lehkha pe chhuak an nih thu a sawi. Rajpurohit chuan,"Kum 2010 hma lama India-a lo lut, khua leh tui nihna nei lo tam tak an awm a, Jodhpur-ah ringawt pawh hian mi 5,000-6,000 vel an awm. Jodhpur bakah Jaisalmer, Bikaner leh Jaipur-ah te Pakistan aṭanga Hindu lo tlanchhia te tana awmna tur 400 chuang siam a ni a, mi nuai chuang fe anga chhut an ni. An zavai hian an rawn kal hun inang lo leh India khua leh tui nihna nei lo vek an ni," a ti.