Parliament building thar sakna tur lungphum PM Narendra Modi-a'n a phum

Prime minister Narendra Modi chuan nimin khan Delhi-ah Central Vista plan peng pawimawh tak Parliament building thar sak ṭanna tur lungphum a phum.

Lungphum phum inkhawmah hian Sringeri Mutt, Karnataka-a mi puithiam parukte chuan Sanskrit-in an sakhaw thuchham an chham hnuah PM Narendra Modi chuan Parliament lungphum phumna hun hi a hmang a ni. He hunah hian India ramchhunga sakhaw hrang hrang chuan an pathian ṭheuh auin thu an chham ve bawk.

He hunah hian mi 200 vel an tel a, chung zingah chuan union Minister, MP, foreign envoy leh sakhaw hrang hrang hruaitute pawh telin lungphum phum inkhawm hi live-in webcast a ni bawk. Parliament building thar sakna tur contract tur hi Tata Projects kutah awmin nimin inkhawmah hian Ratan Tata pawh hmuh tur a awm.

Supreme Court-ah environ­ment kaihhnawihah building thar sakna tur petition hi ngaihthlak a la ngaih avangin building thar sakna tur lungphum hi phum ni tawh mah se hna hi ṭan theih a la ni lo.

Kar hmasa khan Supreme Court chuan sorkar hnenah hian hriattirna pein petition lut chung changa thutlukna siam a nih hma hauhin project chungchangah an hmanhmawh lutuk tih a hrilh a, lungphum phum leh paperwork-te chu kalpui phalsak mah se hna­thawh ṭan erawh a la phalsak lo a, thingkung kih pawh a la phal lo a ni.

Parliament building thar hi Rs Vcb 971 senga sak tur niin kum 2022-ah chuan peihfel hman an tum a ni. 

Prime minister Narendra Modi chuan India rama democracy thlarau awm chu fakin, thil hlu tak a nih thu leh India ram nundan reng a nih thu a sawi. 

Democracy chungchang sawi hian ram dang chuan inthlan leh inrelbawl dan chungchang an sawi ṭhin tih sawiin, nakin lawkah chuan India ram chu ramdangte'n 'Mother of Democracy' an la ti dawn a ni, a ti.

Chhuan lo la awm leh turte chuan Parliament Complex thar, India zalen hnua sak chu an la chhuang hle dawn a ni tih leh India rama democracy a hlawhtlin chhan chu an la hriat fiah a ṭul a ni, a ti bawk. Parliament building thar chu thil hlui leh thil thar an awmza thei a ni tih entirna a ni dawn tih a sawi.

Eptu party lian ber Congress chuan nimina Prime Minister Modi-a lung­phum phum chu sawiselin Congress thupuangtu Randeep Surjewala chuan twitter-ah, "Mr. Modi, Annadata chuan an dikna atan an kawtthlerah ni 16 an beih tawh laiin nang chuan i awmna tur Central Vista hmangin i lo sa mek a ni tih hi history chuan a chhinchhiah dawn a ni! Democracy-ah chuan thiltihtheihna hi nawmna tihhlawh­­tlin lam a ni lo a, vantlang tana thawhna leh vantlang ṭhatna atana thawhna a ni zawk," tiin a ziak.