Congress-in Ghar Ghar Guarantee tlangzarh

Congress party president, Mallikarjun Kharge chuan Lok Sabha inthlan lo awm tur atana an party hmalakna pakhat tur; Ghar Ghar Guarantee chu North East Delhi constituency-a Usmanpur, Kaithwada aṭangin a tlangzarh.

Ghar Ghar Guarantee hmang hian Congress chuan India rama chhungkaw vaibelchhe riatte hnenah an party-in chhungkaw tin tana an thil tiamte hriattirna an neih tur thu Kharge chuan a sawi. He hmalakna tlangzarhna hun a hmannaah hian Kharge chuan,"Ghar Ghar Guarantee hian Paanch Nyay Pachees Guarantee kan kalpui turte mipuite beng thleng ngeia hrilh hriat a kawk a ni. Paanch Nyay Pachees Guarantee-a kan thil tiamte hi Congress hruaitu leh worker zawng zawngte'n a ziak kengin in tinah an sem anga, thlan tlin kan nih a, sorkarna kan siam a nih chuan kan tihlawhlting bawk dawn a ni," a ti.

Kharge hian prime minister Narendra Modi chu Modi ki Guarantee sawi ve fo leh, a thu tiam erawh chuan mipui thleng si loah a puh a,"Keini chuan kan sorkarah mipui tan hna ṭha tak kan thawk a, kan chhunzawm zel bawk ang. PM khan kum tin mi vaibelchhe hnih tan hna pek a tiam a, mipuite erawh chuan hna an neih kan hre lo," tiin a sawi. Congress chuan an tiam loh thil, MGNREGA, RTI, Right to food leh right to education thlengin an pek thu Kharge hian a sawi lang bawk.

Paanch Nyay Pachees Guarantee hi Congress chuan rorelna dik panga; Yuva Nyay, Naari Nyay, Kisaan Nyay, Shramik Nyay leh Hissedari Nyay hmanga an thu tiam hrang hrang tihhlawhtlin an tumna a ni a, an manifesto tak tak erawh naktuk hian Jaipur leh Hyderabad-a rally neihnaah tlangzarh an tum thung a ni.