TN : Cyclone tuarte chhawmdawlna pek chungchang court-ah thlen

Nikum December thlaa Cyclone Michuang an tawrh avanga sorkar laipuiin chhawmdawlna leh ṭanpuina sum a pek tur chungchangah, Tamil Nadu sorkar chuan April 3 khan Supreme Court-ah sorkar laipui nawr tura ngenna a thlen. Tamil Nadu sorkar hian cyclone-in chhiatna hrang hrang a thlente siam ṭhat nan, sorkar laipui hnen aṭang hian Rs. vbc. 37,000 a phût a ni.

Senior advocate, P. Wilson leh advocate, D. Kumanan te chu Tamil Nadu sorkar aiawh hian an ding a, December 14, 2023 khan Home Ministry hnenah chhawmdawlna sum pe chhuak tura ngenna hi an theh luh tawh thu sawiin, court chuan sorkar laipuiin chhawmdawlna sum a pek chhuah hun tur ruat se an duh thu an sawi tel bawk. Tamil Nadu sorkar hian December 26-ah pawh sorkar laipui hnenah hian ruah sur nasa tak avanga ṭanpuina sum an dawn tura ruahman, Rs. vbc. 18,214.52 chu pe chhuak vat turin ziakin an lo ngen tawh bawk.

Tamil Nadu sorkar hian court-a an thlen zingah hian chhawmdawlna atan sum mamawh zualpui pek chhuah a nih theih nana ex parte order siam tur leh, sorkar laipui chu chhawmdawlna Rs. vbc 2,000 pek chhuah chungchang sawi fel tura Tamil Nadu chief minister, MK Stalin leh chief secretary te'n aiawh tur rawtna an siamte pawm tura hriattir turin an ngen bawk a ni.