Chhattisgarh-a Naxal hel thah zat 13 tling tawh

Chhattisgarh, Bijapur district-a police leh Naxal helte inkahnaa Naxal hel thi ruang pathum chhar belh niin, mitthi zat hi 13 an tling tawh niin an tarlang.

Chhattisgarh-ah hian central security force leh state police-te ṭangkawp chuan Naxal helpawlte zawn chhuah beihpui an thlak a, April 2 zingkar khan Bijapur district-a Lendra leh Korcholi khuaa ramhnuaiah police-te leh Naxal-te hi inkapin, he inkahnaa helpawl mi leh sa thi, nimin zing thlenga ruang an chhar tawh zat chu 13 a tling tawh. Official-te chuan ruang an chharte nihna an la hriat loh thu sawiin, PLGA (People’s Liberation Guerrilla Army)-a tel erawh ni ngeia an hriat thu an sawi.

Tun dinhmunah chuan inkahna a thleng tawh rih lo a, mahse, police-te hian Naxal helte'n an tlansan ni ngeia hriat, Light Machine Gun (LMG), .303 rifle, 12 bore gun bakah, grenade leh silai mu, ralthuam dang ṭhahnem tak nen an man bawk a ni. Bijapur district hi Bastar Lok Sabha constituency hnuaia awm a ni a, Lok Sabha inthlan thawh khatna, April 19-ah vote an thlak dawn a, hei vang hian sipai lam pawhin helpawlin vote thlak an tihbuai loh chuan helpawl zawn chhuah beihpui an thlak a ni.