Loneituten sorkar laipui rawtna hnawl

Farm law duh lohna lantirtu, loneitu pawl hrang hrangte nawrh huaihawt chu  nimin kha a ni 15-na a ni. Loneitute hian sorkar laipuiin farm law siamṭhatna tura rawtna a siamte chu an hnawl a, heng dan siamte hi sut tura phutin nawrh chhunzawm zel an tum tih an sawi. 

An thil phut chungchanga sorkar laipui na zawka nawrna tur ruahmanna an siam thu sawiin, loneitute chuan December 12-ah Delhi-Jaipur highway an dang dawn a, hemi ni vek hian ram chhunga toll plaza zawng zawngah nawrh huaihawt an tum bawk. December 14-ah ram pum huapin nawrh huaihawt leh an tum thu sawiin, mipuite chu BJP MP leh MLA tinte laka lungawi lohna lantir turin an sawm nghal a ni.

Nilaini khan sorkar laipui chuan farm law siamṭhatna tura rawtna a siamte chu ziakin loneitute hi a pe a, hei hi loneitu pawl hrang hrang aiawhte chuan an ngaihtuah hnuah an pawm thei lo tih sawiin, dan siamṭhat ringawt hi a tawk lo a, sut leh vek tura an duh thu an sawi.