Bengal-ah BJP president convoy lungin vawm

BJP national president JP Nadda convoy chu nimin khan West Bengal-a South 24 Pargana district-a Diamond Harbour area mi ṭhenkhatin lungin an lo vawm.  

JP Nadda zuitu zinga mi, BJP national general secretary Kailash Vijayvargiya car chu an vawm chhe hle niin party lam chuan an sawi a, media mite motor pawh mipuite hian an bei tel bawk niin an sawi. 

Bengal BJP hotu, Dilip Ghosh chuan Kolkata aṭanga South 24 Pargana district an pan chu, Diamond Harbour-ah hian Trinamool Congress mi leh sa ṭhen­khatten kawng lo dangin, Nadda leh a zuitu motor-te chu lungin an lo vawm a, he thil thleng hian TMC nihna dik tak a tilang chiang hle a ni, a ti. Sorkar chuan venhimna lam a kalpui ṭha tawk lo a, a hmaa BJP president-in hun a hmannaah pawh police duty pawh a dah lo niin a sawi. He thil thleng chungchang hi union home minister Amit Shah leh state thuneitute hnenah pawh ziakin a  thlen nghal tih a sawi bawk. 

JP Nadda pawhin TMC misual rualten an lo bei nia sawiin, a thil tawn chuan Mamata Banerjee kaihhruai West Bengal-ah dan leh thupek kenkawh ṭhat a nih lohzia a tilang a ni, a ti.

West Bengal assembly inthlan hi nakkumah neih a ni dawn a, hemi atana campaign-in BJP president hi ni hnih chamin a zin a ni.