High court-in Kejriwal ban tura ngenna a hnawl

Delhi high court acting chief justice, Manmohan-a kaihhruai bench chuan Delhi excise policy thubuai avanga Enforcement Directorate (ED)-in an man, Arvind Kejriwal ban tura ngenna chu a vawi thum nan nimin khan a hnawl.

Delhi chief minister, Arvind Kejriwal hi jail-a dah a nih avangin Hindu Sena pawl chuan Public Interest Litigation (PIL) an theh lut a, PIL-ah hian Delhi lieutenant governor, VK Saxena chu Kejriwal ban tura an duh thu an tarlang a ni. Hemi chungchangah hian court chuan Saxena chu tihtur hrilh thei dinhmuna an din loh thu leh, a ṭul chuan dan anga ama'n engkim a tih theih thu sawiin, chief minister aṭanga Kejriwal ban chungchang pawh an thuneihna piah lam a nih thu leh, democracy kal dan turin engkim a kal mai tur thu an sawi bawk a ni.

High court hian chief minister aṭanga Kejriwal ban tura ngenna hi kar hmasa khan a lo hnawl tawh a, Kejriwal man a nih hma, January thla khan chief minister aṭanga ban a nih theih nana thu theh luh chu a lo hnawl tawh bawk.

Arvind Kejriwal hian ED-in an manna hi khingin, chhuah tura ngenna a theh lut ve bawk a, hei hi nimin vek khan court hian a ngaihtuah chhunzawm a ni. Kejriwal-a aiawha ding ukil, Abhishek Manu Singhvi chuan politics zawnga thlir loh a, dan ang zawnga sawi pawhin, tun rum ruma man a nih chhan hi BJP-in AAP an beihna hmanrua mai a nih thu a sawi. Kejriwal hi Delhi excise policy thubuaiah Rs. vbc. 600 chuang tichingpenah puh a ni a, March 21 zan khan man niin tunah hian Tihar jail-ah dah mek a ni. April 15 thleng judicial custody-a awm turin trial court chuan a ti a ni.