Home Ministry-in NGO panga FCRA registration titawp

Ministry of Home Affairs (MHA) chuan Foreign Contribution Regulation Act (FCRA) dan bawhchhiat avangin NGO pangate registration a titawp leh.

MHA-in an registration a cancel-sak, NGO panga zingah hian CNI Synodical Board of Social Service, Voluntary Health Association of India, Indo-Global Social Service Society, Church's Auxiliary for Social Action leh Evangelical Fellowship of India te an tel.

Heng NGO-te hian an registration cancel a nih avang hian ram pawn aṭanga ṭanpuina sum an dawn ṭhinte an dawng thei tawh dawn lo a, an pawisa dawn sa pawh hman chhunzawm phalsak an ni lo bawk. MHA-in NGO pangate FCRA registration a tihtawp chhan hi an pawlin phalna an neih leh an tihtur chin piah lama an sum dawn hmanga hna dang an thawh vang niin an tarlang a, hei hi FCRA danin a phalsak chin piah lama chetna niin an sawi.

Sorkar laipui hian FCRA dan bawhchhiat avang hian ramchhunga NGO 6,600 zet chu kum nga chhungin an registration a lo tihtawpsak tawh a, July 17, 2023 thlenga tarlan a nih danin, FCRA registration nei NGO hi 16,301 an awm bawk a ni.