ECI-in AP-a sorkar hnathawk MCC bawhchhiat avangin hrem

Election Commission of India (ECI) chuan Andhra Pradesh-a sorkar hnathawk leh contract-a lak, mi 1,000 tling lo deuh chu Model Code of Conduct (MCC) bawhchhiaa, political party-te campaign-naah an tel avangin hremna a tichhuak.

Andhra Pradesh Chief Electoral Officer (CEO), Mukesh Kumar Meena chuan hremna an pek zingah hian sorkar hnathawk nghet mi 96 an awm bakah, sorkar hnuaia hna hrang hrang, ration semtu ang chi, mi 61, volunteer-a thawk mi 556 leh contract-a thawk mi 140 an tel thu a sawi. Mukesh Kumar Meena chuan,"Volunteer leh contract-a thawkte hi ban nghal an ni a, a ngheta sorkar hnathawkte erawh show-cause notice pek an ni," tiin, volunteer-te chu state sorkarin mipuite hnen thleng ngeia hmalakna a neih hrang hranga puitu atana lak an nih thu a sawi bawk.

Sorkar hnathawk, party thil tihnaa inhnamhnawih, ECI-in a hremte hi eptu party hrang hrang; Telugu Desam Party (TDP), Bharatiya Janata Party (BJP) leh Jana Sena Party (JSP) te'n an hêk a, eptu party-te chuan volunteer-te hi eptu party worker-te an nih thu sawi langin, inthlan lo awm tur atan pawh YSRCP aṭanga hamṭhatna beiseiin an campaign-pui a ni, an ti. Eptu party-te hêkna hi a dik tih fiah a hnuah ECI hian volunteer leh contract-a thawk, party thil tihnaa inhnamhnawihte banna tur hi a tichhuak nghal a ni. ECI hian volunteer-te tana inthlan kaihhnawiha political party-a tel khapna hi a lo tichhuak tawh a ni.