India-in China nena inlaichinna a dah pawimawh : Parrikar

China rama cham mek, Defence Minister Manohar Parrikar chuan nimin khan Beijing-a People's Liberation Army headquarters-ah China Defence Minister General Chang Wanquan a kawm.

Chang nen hian darkar hnih chhung meeting an neih hnua chanchin thar lakhawmtute a kawmnaah, Parrikar chuan India chuan China nena a inlaichinna chu a dah pawimawh hle a, inzawmna ṭha leh zau zawk siam pawh a duh a ni, a ti.

Parrikar hi kum thum chhunga India defence minister zinga China ram tlawh hmasa ber a ni a, tun ṭum hi minister a nih hnua China a tlawh ṭum khatna a ni.

Chang Wanquan pawhin Parrikar-an a ram a tlawh chuan ram pahnih sipaite inkarah inrintawnna leh thawhhona ṭha a thlen a beisei thu a sawi.

Wang a hmuh hnu hian Parrikar chuan Central Military Commission (CMC) vice chairperson Gen Fan Changlon a hmu a, tlai lamah Premier Li Keqiang a hmu leh bawk.

Minister hian vawiinah India leh China ramri enkawltu, Chengdu-a western military headquarters a tlawh dawn a, commanding officer Zhao Zongqi hmuin, Special Operation Forces brigade a endik nghal dawn a ni.