Mallya'n a loan lak zahve dawn ram pawn lamah a invest

Vijay Mallya chuan IDBI bank aṭanga loan a lak, cheng vaibelchhe 950 aṭanga a zahve dawn chu rawn pawn lamah a invest niin investigator-te chuan an sawi.

Supreme Court chaun Enforcement Directorate-in Vijay Mallya laka non-bailable warrant leh red-corner notice tichhuak tura a ngenna chu a ngaihtuah a ni. Rajya Sabha MP Mallya hian bank hrang hranga aṭanga loan a puk, cheng vaibelchhe 9,400 a ba a ni. Bank hrang hrangin a loan ba rul tura an nawr laiin, March thla khan Mallya hian India a chhuahsan a, tun thlengin a la rawn kir lo.

ED counsel Hiten Veneaonkar chuan court hnenah hian Mallya hian IDBI bank loan a lak zinga cheng vaibelchhe 430 chu rampawn aircraft hawh man pekna atan te, spare parts lakluhna atan leh aircraft maintenance service atan a hmang tih a sawi. He loan hi sum lama a tlakchhiat avanga a tihtawp tak, Kingfisher Airlines hnenah pek a ni. ED chuan Kingfisher Airlines hminga sum chetkual tir dante hi Britain, France leh United States hnenah a lo zawtchiang tawh a ni. ED official ṭhenkhat chuan Mallya hian chhiah awlruk tumin heng sumte hi ram pawn lamah a chheprelh mai thei nia an rin thu an sawi.

Venegaonkar chuan Mallya sum tihchet dan hi an chhui kual hnuah, a sum puk zinga tam tak chu ram pawn lama hmun leina atana hmang tih an hriatchhuah thu a sawi.

Kum 60 mi, Vijay Mallya hian a khawsak nawmsak dan avangin 'king of good times' tia vuah alo ni tawh ṭhin. India bakah ram pawn lam, US, South Africa, UK leh France-ahte in hmun ṭha tak tak a nei nia hriat a ni. Tunah hian UK-ah a awm mek a, ED-in thu zawhfiah tura ṭum thum an koh hnuah pawh ala inlan duh lo.

Mallya hian ED zawhna te chu a awmna hmun aṭangin video-conferencing emaw, mail emaw hmanga a chhan tur thu a sawi a, mahse hei hi ED chuan a pawm lo a, thil tisualtu zawk duhdan angin an thil chhui hna chu an kalpui dawn lo tih an tarlang.

Bank intelkhawmte chuan Mallya-an a sum bat zinga cheng vaibelchhe 4,000 September thla lo pek hmasak a rawtna chu an pawm lo. Stae bank kaihhruai bank intelkhawmte hian Mallya chu April 26-a Supreme Court-ah a leibat chungchang ngaihtuah a nih hunah amah ngei inlan turin an phut.